Kryeministri Ramush Haradinaj i shoqëruar nga zëvendëskryeministri Enver Hoxhaj dhe ministri i mbrojtjes Rrustem Berisha kanë bërë homazhe tek Pllaka Memoriale e ushtarëve të rënë të KFOR-it.

Haradinaj tha se e kishte nderim të përjetshëm për të gjithë ata që ndihmuan lirinë dhe paqen e Kosovës, raporton arbresh.info.

“Nesër bëhen 20 vite nga fillimi i fushatës  ajrore të NATO-s e cila përmbylli një tragjedi të popullit të Kosovës që shpëtoi shumë jetë, e ktheu lirinë për jetën për popullin e Kosovës. E kam për nder në emër të qeverisë të nderoj te lapidari ku kujtohen të gjithë që kanë shërbyer në Kosovë,  ushtarët e KFOR-it dhe të NATO-s, nderim i përjetshëm për të gjithë që e ndihmuan lirinë tonë dhe paqen tonë”, tha kryeministri.

Tutje Haradinaj thotë se nuk ka mik më të mirë se ai që të gjendet në ditë të vështira, e miku i përjetshëm për ne është NATO.

“Populli i Kosovës veprimeve te Amerikës i është përgjithmonë mirënjohës nuk ka mik më të mirë se ai që të gjendet në ditë të vështira, na ditë më të vështirë nuk kemi pas se në atë kohë e miku më i mirë i përjetshëm për ne është NATO, kur ka vullnet e qëndrueshmëri asgjë nuk është e vështirë”, tha Haradinaj./Arbresh.info/